ഓരോ ദിവസവും നമ്മുടെ നിരത്തുകളിൽ പൊലിയുന്നത് ഒരുപാട് ജീവനുകളാണ്. തിരക്കിട്ട ജീവിതത്തിൽ പലപ്പോഴും സുരക്ഷാ നിർദ്ദേശങ്ങൾ നമ്മൾ സൗകര്യപൂർവ്വം മറക്കുന്നു. ലോകാരോഗ്യ സംഘടനയുടെ കണക്കുകൾ പ്രകാരം പ്രതിവർഷം 1.35 ദശലക്ഷം ട്രാഫിക് മരണങ്ങളാണ് ആഗോളതലത്തിൽ സംഭവിക്കുന്നത്. നാഷണൽ ക്രൈം റെക്കോർഡ്സ് ബ്യൂറോയുടെ റിപ്പോർട്ട് അനുസരിച്ച്, ഇന്ത്യയിൽ ഒരു ദിവസം ഏകദേശം 426 പേർ റോഡപകടങ്ങളിൽ മരിക്കുന്നുണ്ട്. നൂറ് അപകടങ്ങളിൽ 44 എണ്ണവും ഇരുചക്ര വാഹനങ്ങളുമായി ബന്ധപ്പെട്ടാണ്.
കണക്കുകൾ ഞെട്ടിക്കുന്നതാണ്. 2020 മുതൽ ഈ വർഷം മാർച്ച് വരെ കേരളത്തിൽ മാത്രം 2.63 ലക്ഷം ചെറുതും വലുതുമായ വാഹനാപകടങ്ങൾ റിപ്പോർട്ട് ചെയ്യപ്പെട്ടു. ഇതിൽ 23,410 പേർക്ക് ജീവൻ നഷ്ടമാകുകയും 2.98 ലക്ഷം പേർക്ക് പരിക്കേൽക്കുകയും ചെയ്തു.

വർഷം തോറുമുള്ള അപകടങ്ങളുടെ എണ്ണം വർദ്ധിച്ചുവരുന്നതായാണ് കാണുന്നത്:

 * 2020: 27,877 അപകടങ്ങൾ, 2,979 മരണം, 30,510 പരിക്ക് (23,216 ഗുരുതരം)
 * 2021: 33,296 അപകടങ്ങൾ, 3,429 മരണം, 40,204 പരിക്ക് (27,537 ഗുരുതരം)
 * 2022: 43,910 അപകടങ്ങൾ, 4,317 മരണം, 49,307 പരിക്ക് (35,688 ഗുരുതരം)
 * 2023 (ജൂലൈ വരെ): 28,067 അപകടങ്ങൾ, 2,422 മരണം, 31,939 പരിക്ക്
 * 2024: 48,919 അപകടങ്ങൾ, 3,774 മരണം, 54,743 പരിക്ക്
 * ഈ വർഷം (മാർച്ച് വരെ): 12,636 അപകടങ്ങൾ, 956 മരണം, 14,391 പരിക്ക്

കൂടുതലും ഇരുചക്ര വാഹനങ്ങൾ

കഴിഞ്ഞ 10 വർഷത്തിനിടെ നടന്ന അപകടങ്ങളിൽ 60% ഇരുചക്ര വാഹനങ്ങൾ ഉൾപ്പെട്ടവയാണ്. കേരളത്തിലെ ആകെ 1.66 കോടി വാഹനങ്ങളിൽ 1.08 കോടിയും ഇരുചക്ര വാഹനങ്ങളാണ് എന്നത് ഇതിന് ഒരു കാരണമാകാം. റോഡ് സേഫ്റ്റി അതോറിറ്റിയുടെ കണ്ടെത്തൽ അനുസരിച്ച്, ഇരുചക്ര വാഹനങ്ങളുടെ വർധിച്ച ഉപയോഗവും റോഡുകളുടെ അപര്യാപ്തതയുമാണ് അപകടങ്ങൾ കൂടാൻ കാരണം. ഇരുചക്ര വാഹനങ്ങൾ കഴിഞ്ഞാൽ ലോറികളും സ്വകാര്യ ബസുകളുമാണ് കൂടുതൽ അപകടങ്ങളിൽപ്പെടുന്നത്.

അപകടങ്ങളുടെ പ്രധാന കാരണങ്ങൾ ഇവയാണ്:

 * അമിതവേഗം
 * മദ്യപിച്ച് വാഹനമോടിക്കുക
 * തെറ്റായ ദിശയിൽ ഡ്രൈവ് ചെയ്യുക
 * അശ്രദ്ധ
 * റോഡിന്റെ ശോചനീയാവസ്ഥ
 * മൊബൈൽ ഫോണിൽ സംസാരിച്ച് വാഹനമോടിക്കുക

ഡ്രൈവിംഗ് ലൈസൻസ് ലഭിക്കുന്നതിനപ്പുറം റോഡ് നിയമങ്ങളെക്കുറിച്ചും പാലിക്കേണ്ട മര്യാദകളെക്കുറിച്ചും പലർക്കും വേണ്ടത്ര ധാരണയില്ല. വാഹനമോടിക്കുന്നവർ മാത്രമല്ല, കാൽനട യാത്രക്കാരും ചില കാര്യങ്ങൾ ശ്രദ്ധിക്കേണ്ടതുണ്ട്. റോഡിന്റെ ഏത് വശത്തുകൂടി നടക്കണം എന്ന് പോലും പലർക്കും അറിയില്ല. തിരക്കേറിയ കവലകളിലും ഇടുങ്ങിയ റോഡുകളിലും റോഡ് മര്യാദകൾ മറന്ന് വാഹനമോടിക്കുന്ന ഒരു മോശം സംസ്കാരം നമ്മുടെ നാട്ടിൽ നിലവിലുണ്ട്.

റോഡിന്റെ നിലവാരക്കുറവും ഒരു വില്ലൻ

റോഡുകളുടെ ശോചനീയാവസ്ഥയും അപകടങ്ങൾക്ക് ഒരു പ്രധാന കാരണമാണ്. നിലവിലുള്ള റോഡുകൾ കൃത്യസമയത്ത് അറ്റകുറ്റപ്പണികൾ നടത്തി പരിപാലിച്ചാൽത്തന്നെ അപകടങ്ങൾ ഗണ്യമായി കുറയ്ക്കാൻ സാധിക്കും. ട്രാഫിക് നിയമങ്ങൾ തെറ്റിക്കുമ്പോൾ പിഴ ചുമത്തുന്നത് കൊണ്ട് മാത്രം നല്ലൊരു റോഡ് സംസ്കാരം വളർത്തിയെടുക്കാൻ കഴിയില്ല. സ്കൂൾ തലം മുതൽ ട്രാഫിക് ബോധവൽക്കരണ ക്ലാസുകൾ നൽകേണ്ടത് അത്യാവശ്യമാണ്. ഇങ്ങനെയുള്ള പരിഷ്കാരങ്ങൾ ഉൾപ്പെടുത്തിയുള്ള വിദ്യാഭ്യാസ സമ്പ്രദായമാണ് നമുക്ക് വേണ്ടത്.
ഓരോ ദിവസം കഴിയുന്തോറും നിരത്തിലിറങ്ങുന്ന വാഹനങ്ങളുടെ എണ്ണം കൂടുന്നുണ്ടെങ്കിലും, അതിനനുസരിച്ച് റോഡുകളുടെ പ്രശ്നങ്ങൾ പരിഹരിക്കപ്പെടുന്നില്ല എന്നതാണ് സത്യം. വികസിത രാജ്യങ്ങളിലെ റോഡ് മര്യാദകൾ നമ്മളെ അതിശയിപ്പിക്കാറുണ്ട്. അനാവശ്യമായി ഹോൺ അടിക്കുന്നത് പോലും അവിടെ മോശമായി കണക്കാക്കുന്നു. നല്ലൊരു ഗതാഗത സംസ്കാരം ഓരോ വ്യക്തിയുടെയും ഉത്തരവാദിത്തമാണ്.
നമ്മൾ കാരണം ഒരാളുടെയും ജീവൻ നഷ്ടപ്പെടരുത് എന്നൊരു ഉറച്ച തീരുമാനം എല്ലാവർക്കുമുണ്ടാകണം. മാതൃകാപരമായ ഗതാഗത സംസ്കാരം വളർത്തിയെടുത്ത് റോഡപകടങ്ങൾ പരമാവധി കുറയ്ക്കാൻ നമുക്ക് ഒരുമിച്ച് പരിശ്രമിക്കാം.